Samarqandda ko‘p qavatli uylar hamda ta’lim va tibbiyot muassasalarini lokal qozonxonalar bilan ta’minlash rejalashtirilmoqda. O‘zAning yozishicha, bu shahar aholisi va ijtimoiy soha obyektlarini kuz-qish mavsumida markazlashgan holda issiq suv va issiqlik manbai bilan ta’minlashdagi muammolarni hal qilishga yordam beradi.
Jumladan, shaharning Sartepa maskanidagi bir qator xususiy uy-joy mulkdorlari shirkatlari tomonidan lokal qozonxonalar asosida aholiga issiqlik manbai yetkazib berish yo‘lga qo‘yildi. To‘rtta to‘qqiz qavatli uyga xizmat ko‘rsatuvchi “Shohjahon Shermadad” xususiy uy-joy mulkdorlari shirkati joriy yilda bank krediti hisobidan lokal qozonxona o‘rnatdi.
“O‘tgan mavsumda mazkur qozonxona orqali uchta uyga issiqlik manbai yetkazib berildi. Tabiiy gaz, elektr energiyasi va suv sarfini hisob-kitob qilib ko‘rdik, avvalgi yillarga nisbatan ancha arzon tushdi. Aholi ham mamnun”, — deydi shirkat raisi Sherzod Omonov. Uning so‘zlariga ko‘ra, bu yil to‘rtinchi uy ham mazkur tarmoqqa ulangan va hozirda shirkatda issiqlik ta’minoti bilan bog‘liq muammolar yo‘q.
Samarqand shahar hokimligidan olingan ma’lumotlarga ko‘ra, shu paytga qadar 300 ga yaqin ko‘p qavatli uyning tomi mukammal va joriy ta’mirlangan. 500 dan ortiq uy-joyning yerto‘lasida joriy ta’mirlash, suv qochirish, dezinfeksiyalash ishlari olib borilgan.
Shahar hududidagi mavzelar va mahallalarning 62 ming kvadrat metr hajmdagi ichki yo‘llariga asfalt yotqizildi. Shuningdek, ko‘p qavatli uy-joylar atrofidagi 61 ming 610 kvadrat metr ichki yo‘l va yo‘laklarga beton qoplamasi yotqizildi.
Qariyb besh kilometrlik gaz tarmog‘i, 80 kilometr elektr tarmog‘i mukammal ta’mirlandi.
27, 81 va 112-maktabgacha ta’lim muassasalarining tomi ta’mirlandi, yangi deraza romlari o‘rnatildi. Viloyat qon quyish markazi, ko‘z kasalliklari shifoxonasi va 1-shahar bolalar shifoxonasidagi ta’mirlash ishlarining so‘nggi bosqichi davom etmoqda.
Izoh (0)