Жорий йилнинг ўтган 9 ойи мобайнида «Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 90 та қонунбузилиш ҳолатларида салкам 250 дона психотроп таблеткалар ҳамда қиймати 730 миллион сўмдан ортиқ бўлган тиббиёт буюмлари ва дори-дармон воситаларининг ноқонуний олиб ўтилишига чек қўйилган. Бу ҳақда Божхона қўмитаси матбуот хизмати хабар бермоқда.
Жумладан, Тошкент халқаро аэропортида «Деҳли—Тошкент» рейси бўйича парвозини якунлаган фуқаро О.Раҳимовга (мақоладаги барча исм-шарифлар ўзгартирилган) тегишли юклар ўрнатилган тартибда божхона кўригидан ўтказилганда, ундаги кийимлар орасига 488 дона турли дори воситалари яширилганлиги фош қилинди. Аниқланишича, ноқонуний равишда олиб киришга уринилган мазкур дори воситаларининг умумий қиймати тахминан 14 миллион сўмни ташкил қилар экан.
Истанбулдан учиб келган С.Санжаров божхоначиларнинг кўзини шамғалат қилишга уриниб, йирик мидордаги дори-дармон воситаларини яширин равишда олиб киришни кўзлаган эди. Аммо, божхона кўриги чоғида ушбу шахснинг қиймати 73 миллион сўмлик 2 турдаги 316 қути дори воситаларини қинғир йўллар билан олиб кириш режаси барбод бўлди.
Дори-дармон воситаларининг олиб кирилишида таркибида психотроп моддалар бўлган дори воситаларига алоҳида ёндашиш талаб этилади. Чунки, жисмоний шахслар олиб кираётган препарат таркибида кам миқдорда бўлса-да гиёҳванд ёки психотроп моддалар мавжуд бўлса ва бу ҳақда йўловчи божхона декларациясида кўрсатмаса, маъмурий ёки жиноий жавобгарликка тортилиши мумкин.
Истанбулга парвози олдидан фуқаро Д.Боқиеванинг безовталаниши божхоначиларда шубҳа уйғотди. Шундан сўнг унга тегишли қўл юклари ўрнатилган тартибда божхона кўригидан ўтказилганда юклар орасида йўловчи божхона декларациясида қайд қилинмаган ва божхона ходимининг оғзаки сўрови пайтида маълум қилинмаган 48 дона «Феназепам» психотроп таблеткалари яширилгани маълум бўлди.
Худди шу турдаги таблеткалардан 50 донасини яширин ҳолда олиб чиқишга уринган фуқаро А.Хегай ҳам «Тошкент—Новосибирк» йўналиши бўйича парвоз олдидан божхоначилар қаршисида ер чизиб қолди.
Москвадан учиб келган К.Таня ҳам таваккалга қўл урди. Йўловчи божхона декларациясида ва божхона ходимларининг оғзаки сўрови пайтида маълум қилмасдан туриб, бу аёл 143 дона «Феназепам» психотроп таблеткаларини ноқонуний равишда олиб киришга уринган пайтида тўхтатиб қолинди.
Гиёҳвандлик воситалари, психотроп моддалар ва прекурсорларни олиб кириш ва олиб чиқиш фаолиятнинг тегишли тури учун лицензияга эга бўлган юридик шахслар томонидан Ўзбекистон Республикаси Соғлиқни сақлаш вазирлиги томонидан бериладиган сертификатлар асосида амалга оширилади.
Изоҳ (0)