Германия ҳукумати Иккинчи жаҳон уруши даврида немис асирлигида бўлган собиқ совет асирларига бир марталик ёрдам пули топширади, дея хабар бермоқда Германиянинг Ўзбекистондаги элчихонаси.
«Германия Бундестаги 2015 йил 21 май куни собиқ совет ҳарбий асирларига уларга кўрсатилган адолатсизликни тан олиш сифатида рамзий ёрдам пули бериш ҳақида қарор қабул қилди. 1941 йил 22 июндан 1945 йил 8 майгача давом этган Иккинчи Жаҳон уруши мобайнида немис асирлигида бўлган совет ҳарбийлари 2,5 минг евро миқдорида бир марталик ёрдам пули олишлари мумкин», — дейилади элчихона хабарида.
Мазкур ёрдам пулига нисбатан ҳуқуқий даъволар қабул қилинмайди, ёрдам пули олиш ҳуқуқини учинчи шахсларга ўтказилмайди ва мерос қилиб ҳам қолдирилмайди. Ёрдам пулини олиш бўйича аризани фақат жабрланувчининг ўзи ёки унинг расмий вакили топшириши мумкин. Ушбу жараён тафсилотлари алоҳида ҳужжат доирасида белгиланади.
Ёрдам пулини олишга оид эркин шаклда тузилган ёзма ариза Германиянинг марказий хизматлар ва ҳал қилинмаган мол-мулк масалалари бўйича Федерал қўмитасининг қуйидаги почта манзилига юборилиши мумкин:
Bundesamt für zentrale Dienste und offene VermögensfragenDGZ Ring 1213086 Berlin
Аризачи собиқ совет ҳарбий асирларига кўрсатилган адолатсизликни тан олиш сифатида бериладиган ёрдам пулини олиш учун ариза топшираётганлигини ёзма равишда баён қилиши лозим. Аризачининг яшаш манзили тўлиқ ва аниқ кўрсатилиши керак. Исм-фамилия ва отасининг исми билан биргаликда туғилган санаси ҳам кўрсатилиши лозим.
«Ушбу маълумотлар аризачига расмий бланкани жўнатиш учун етарлидир. Чунки уларнинг асосида аризачидан қўшимча маълумотлар ва ҳужжатлар талаб қилинади. Эркин равишда тузилган аризада қўшимча маълумотларни қайд этмаслик учун ариза бланкасини ҳар қандай ҳолатда тўлдириш лозим бўлади», — дейилади элчихона хабарида.
Изоҳ (0)