Germaniya hukumati Ikkinchi jahon urushi davrida nemis asirligida bo‘lgan sobiq sovet asirlariga bir martalik yordam puli topshiradi, deya xabar bermoqda Germaniyaning O‘zbekistondagi elchixonasi.
“Germaniya Bundestagi 2015-yil 21-may kuni sobiq sovet harbiy asirlariga ularga ko‘rsatilgan adolatsizlikni tan olish sifatida ramziy yordam puli berish haqida qaror qabul qildi. 1941-yil 22-iyundan 1945-yil 8-maygacha davom etgan Ikkinchi Jahon urushi mobaynida nemis asirligida bo‘lgan sovet harbiylari 2,5 ming yevro miqdorida bir martalik yordam puli olishlari mumkin”, — deyiladi elchixona xabarida.
Mazkur yordam puliga nisbatan huquqiy da’volar qabul qilinmaydi, yordam puli olish huquqini uchinchi shaxslarga o‘tkazilmaydi va meros qilib ham qoldirilmaydi. Yordam pulini olish bo‘yicha arizani faqat jabrlanuvchining o‘zi yoki uning rasmiy vakili topshirishi mumkin. Ushbu jarayon tafsilotlari alohida hujjat doirasida belgilanadi.
Yordam pulini olishga oid erkin shaklda tuzilgan yozma ariza Germaniyaning markaziy xizmatlar va hal qilinmagan mol-mulk masalalari bo‘yicha Federal qo‘mitasining quyidagi pochta manziliga yuborilishi mumkin:
Bundesamt für zentrale Dienste und offene VermögensfragenDGZ Ring 1213086 Berlin
Arizachi sobiq sovet harbiy asirlariga ko‘rsatilgan adolatsizlikni tan olish sifatida beriladigan yordam pulini olish uchun ariza topshirayotganligini yozma ravishda bayon qilishi lozim. Arizachining yashash manzili to‘liq va aniq ko‘rsatilishi kerak. Ism-familiya va otasining ismi bilan birgalikda tug‘ilgan sanasi ham ko‘rsatilishi lozim.
“Ushbu ma’lumotlar arizachiga rasmiy blankani jo‘natish uchun yetarlidir. Chunki ularning asosida arizachidan qo‘shimcha ma’lumotlar va hujjatlar talab qilinadi. Erkin ravishda tuzilgan arizada qo‘shimcha ma’lumotlarni qayd etmaslik uchun ariza blankasini har qanday holatda to‘ldirish lozim bo‘ladi”, — deyiladi elchixona xabarida.
Izoh (0)