Икки ёшли бола гигант қовоқ ёрдамида машинани мажақлади

АҚШнинг Миннесота штатида истиқомат қилувчи Чарли Бёрнстром ярим йилда 655 килограммли қовоқ етиштирди. Мавсум охирида эса у маҳаллий аҳолига байрам уюштириб, ушбу қовоқ билан автомобилни мажақлашга қарор қилди, дея хабар бермоқда Meduza.

Бу томошага 400 га яқин одам йиғилди. Ташрифчиларга бир доллар эвазига чипта сотиб олиш таклиф қилинди — мазкур чипта мажақланажак автомобиль узра 25 метр баландикда осилиб турган қовоқни қўйиб юборадиган арқонни тортиш ҳуқуқини ютиб олиш учун имконият берарди.

Бу ҳуқуқни икки ёшли Эмметт Питерсон қўлга киритди. Қовоқ ва машинанинг «учрашуви» қуйидагича юз берди:

https://www.youtube.com/watch?v=vvsejhF0tH4

https://www.youtube.com/watch?v=QNSMGZ--bQA

Тадбирда 360 доллар тўпланди, бу пуллар маҳаллий болалар учун бепул китоблар тарқатиш билан шуғулланувчи ташкилотга ўтказиб берилади.

«Машинани сен мажақлаб ташладингми?», — деб сўради Питерсондан Гранд Форкс Ҳералд мухбири Метт Хенсон. «Йўқ, бу ишни қовоқ қилди», — дея жавоб берди болакай.