ЮКОСнинг собиқ акциядорлари томонидан берилган даъволар сабаб ҳибсга олинган Россиянинг хориждаги активлари орасида Euronews телеканалига эгалик қилувчи Франциянинг Euronews S.A. компаниясининг Бутунроссия давлат телерадиокомпанияси (ВГТРК) ихтиёрида бўлган 7,5 фоиз акцияси ҳам бор. Бу ҳақда «РБК» хабар бермоқда.
Франция телекомпаниясига яқин манбаларнинг маълум қилишича, активларнинг ҳибсга олиниши Euronews’нинг ҳам, ВГТРКнинг ҳам фаолиятига жиддий таъсир кўрсатмаган. ЮКОСнинг собиқ акциядорлари вакиллари ҳам, Euronews ҳам мазкур ахборот юзасидан изоҳ берганича йўқ.
«Активларнинг ҳибсга олиниши камида уларни бошқариш, яъни уларни сотиш, эгалик ҳуқуқини бошқа бировга бериш имкони йўқлигини билдиради. Қолгани суд қарорига боғлиқ: ҳибсга олиш акцияларни гаровга қўйиш, улар орқали овоз бериш, улар бўйича дивидендлар олиш кабиларни тақиқлашни ҳам назарда тутиши мумкин», — дейди ҳуқуқшунос Илья Рачков.
Франциянинг Euronews S.A. компанияси 1993 йилда ишга тушган ва 13 тилда куну тун эфирга чиқувчи Euronews телеканалига эгалик қилади. Euronews дастурларини жаҳоннинг 158 мамлакатидаги 425 миллион хонадонда томоша қилиш мумкин.
Изоҳ (0)