Шимолий Корея ҳукумати ҳар йили ўзининг минглаб фуқароларини ишлаш учун мажбурий равишда чет элга жўнатади. Бу ҳақда, «Интерфакс» хабарига кўра, БМТнинг КХДРдаги инсон ҳуқуқлари бўйича махсус маърузачиси Марзуқи Дарусмон маълум қилди.
Унинг сўзларига кўра, КХДРнинг 50 мингдан ортиқ фуқароси хорижда тутқунликда меҳнат қилади. Дарусмоннинг қайд этишича, Пхеньян ўзига нисбатан жорий этилган санкцияларни айланиб ўтиб, валюта ишлаш мақсадида ўз ишчиларини хорижга йўллайди.
БМТ маълумотларига кўра, шимолий кореяликларни, асосан, Хитой ва Россияга, шунингдек, Африка, Яқин Шарқ ва Европага, хусусан, Польшага жўнатишмоқда.
Дарусмоннинг таъкидлашича, чет элдаги Шимолий Корея фуқаролари кунига 20 соатдан меҳнат қилишга мажбур, айни вақтда ойига фақат икки марта дам олиш кунига эга, уларнинг аксарияти тўйиб овқат ҳам емайди. КХДР ишчилари асосан қурилиш, ўрмон хўжалиги, тоғ-кон ва енгил саноатларида ишлайди.
БМТнинг қайд этишича, расмий Пхеньян ишчиларнинг маошларини қўлга киритиш орқали ҳар йили 2,1 миллиард евро пул ишлаб топади.
Дарусмоннинг огоҳлантиришича, Шимолий Корея фуқароларини номақбул шароитларда ишлаш учун ёллаётган корхоналар «номақбул мажбурий меҳнат тизимининг қатнашчилари»га айланиб қолади. Қайд этиш жоиз, КХДР ҳукумати мамлакатда инсон ҳуқуқларини бузиб келаётгани сабаб БМТ томонидан бир неча бор танқид остига олинган.
Изоҳ (0)