2016 йилнинг сентябрь ойида Ҳиндистонда бўлиб ўтадиган ўсмирлар ўртасидаги Осиё чемпионати финал босқичида Непал U-17 иштирок этмайдиган бўлди, деб хабар беради Ўзбекистон футбол федерацияси матбуот хизмати.
Ушбу терма жамоа футболчиси Маниш Каркининг ёши аслида ҳужжатларида кўрсатилганидан катта экани аниқлангани сабабли, жамоанинг саралаш босқичидаги ҳар бир ўйини натижалари бекор қилиниб, унинг ўрнига ҳар уч ўйинга ҳам 0:3 ҳисобида мағлубият ёзилди.
Шундан кейин «B» гуруҳидаги ҳолат қайтадан ҳисоблаб чиқилди. Натижада Қирғизистон гуруҳда биринчи ўринга кўтарилди. Энди Осиё чемпионатида Қирғизистон ўсмирлар терма жамоаси саралашнинг «B» гуруҳи ғолиби сифатида иштирок этади.
Эслатиб ўтамиз, Ўзбекистон ўсмирлар терма жамоаси Осиё чемпионатининг саралаш босқичида «A» гуруҳидан ўрин олганди ва Мальдив ороллари, Фаластин, Яман терма жамоаларини мағлуб этиб, Осиё чемпионати финал босқичига йўлланмани қўлга киритган эди.
Изоҳ (0)