Ҳиндистондаги маочилар ҳарбий хизматчини ўлдирди ва 37 машинани ёқиб юборди

Ҳиндистон марказидаги Чхаттисгарх штатида маочилар томонидан амалга оширилган икки ҳужум оқибатида бир ҳарбий ҳалок бўлди, икки киши тан жароҳати олди, 37 қурилиш техникаси ёқиб юборилди. Бу ҳақда «ТАСС» хабар бермоқда.

Хабар беришларича, Сукма округида ўнлаб маочилар ҳарбий патрулга ҳужум қилган, отишма оқибатида бир ҳарбий ҳалок бўлган, икки нафари тан жароҳати олган.

Йўл-қурилиш ишлари олиб борилаётган Бижапур туманида эса қуролланган маочилар ишчилар лагерига бостириб кириб, 37 дона қурилиш техникаси — юк машиналари, ўзи ағдарувчи юк машиналари, экскаваторлар, тракторлар, бетонқоргичларни ёқиб юборган.

Полиция «Тутиб олиш» тадбирини эълон қилиб, ҳодиса жойини ўраб олган.

Маочи-жангарилар «қизил камар» деб аталадиган штатлар — Биҳар, Чхаттисгарх, Жаркханд, Орисса ва Махараштранинг шарқий қисмидаги чангалзорларда яширинча фаолият олиб боради.

Улар Ҳиндистон ҳукуматига қарши ҳақиқий партизан урушини олиб боради, қишлоқларга босқинлар уюштиради, амалдорлар ва ҳуқуқни муҳофаза қилиш идоралари ходимларига ҳужум қилади.