Космик чиқиндининг WT1190F шифрли йирик бўлаги 13 ноябрь, жума куни Ерга келиб тушади, дея хабар бермоқда «РИА Новости». Ишдан чиққан ракетанинг бир бўлаги Шри-Ланка ороли ҳудудига қулайди.
Ушбу бўлак 2013 йил февралида аниқланган, бироқ «сунъий йўлдош» тезда кўздан йўқолган, олимлар эса у бошқа Ер атрофига қайтмайди, деб ҳисоблаган эди.
Шу йил октябрида эса у яна Ерга яқин ҳудудда топилди. Олимлар эски суратлар ва янги кузатувлар ёрдамида космик чиқинди айнан қаерга келиб тушишини аниқлашга муваффақ бўлди. Уларнинг ҳисоб-китобларига кўра, ракета бўлаги 2015 йил 13 ноябрда Тошкент вақти билан тахминан 11:20 да Шри-Ланка ороли қирғоқларидан 100 километр нарига қулайди.
1—2 метрли бўлак атмосферада бутунлай ёниб кетиши мумкин, бироқ у Ҳинд океани юзасигача учиб келиши ҳам эҳтимолдан холи эмас.
Изоҳ (0)