Россиялик мухолифат арбоби Борис Немцовни ўлдиришда гумон қилинаётган Заур Дадаев 2015 йил октябрь ойи бошида «ватанпарварлик туйғулари туғён уриб», Россия президентига уни Сурияга жанг қилиш учун юборишни сўраб, мурожаат қилганди. Бу ҳақда, вазиятдан бохабар манбаларга асосланиб, «Росбалт» хабар бермоқда.
Дадаев ўз мурожаатида ҳар доим Россия учун хизмат қилгани, яна бир бор қўлда қурол билан мамлакатга содиқ эканлигини исботлашга тайёр эканлигини билдирган. Айни вақтда, у Немцовнинг ўлдирилишига алоқадор эмаслигини, ундан иқрорли кўрсатмалар қийнаш ва таҳдид йўли билан олинганини қайд этган.
«Росбалт» манбасининг сўзларига кўра, мазкур мурожаатни жазони ўташ муассасаси раҳбарияти Россия Тергов қўмитасига йўллаган, у ерда мурожаатдан нусха олинган ва ҳақиқий хат Россия президенти маъмуриятига етказилган.
Президент маъмурияти эса Дадаевнинг мактубини жавоб тайёрлаш учун қайтиб Тергов қўмитасига йўллаган. Жорий ҳафта охирида олинган жавоб хатида Сурияга жўнатиш илтимоси эътиборсиз қолдирилганини кўриш мумкин.
Терговчиларнинг қайд этишича, Путинга йўлланган мурожаатдаги Дадаевга нисбатан қўлланилган қийноқлар ҳақидаги маълумотлар айбланувчининг аввалроқ терговгача бўлган аризаси доирасида ўрганиб чиқилган ва ўз тасдиғини топмаган.
Изоҳ (0)