Rossiyalik muxolifat arbobi Boris Nemsovni o‘ldirishda gumon qilinayotgan Zaur Dadayev 2015-yil oktabr oyi boshida “vatanparvarlik tuyg‘ulari tug‘yon urib”, Rossiya prezidentiga uni Suriyaga jang qilish uchun yuborishni so‘rab, murojaat qilgandi. Bu haqda, vaziyatdan boxabar manbalarga asoslanib, “Rosbalt” xabar bermoqda.
Dadayev o‘z murojaatida har doim Rossiya uchun xizmat qilgani, yana bir bor qo‘lda qurol bilan mamlakatga sodiq ekanligini isbotlashga tayyor ekanligini bildirgan. Ayni vaqtda, u Nemsovning o‘ldirilishiga aloqador emasligini, undan iqrorli ko‘rsatmalar qiynash va tahdid yo‘li bilan olinganini qayd etgan.
“Rosbalt” manbasining so‘zlariga ko‘ra, mazkur murojaatni jazoni o‘tash muassasasi rahbariyati Rossiya Tergov qo‘mitasiga yo‘llagan, u yerda murojaatdan nusxa olingan va haqiqiy xat Rossiya prezidenti ma’muriyatiga yetkazilgan.
Prezident ma’muriyati esa Dadayevning maktubini javob tayyorlash uchun qaytib Tergov qo‘mitasiga yo‘llagan. Joriy hafta oxirida olingan javob xatida Suriyaga jo‘natish iltimosi e’tiborsiz qoldirilganini ko‘rish mumkin.
Tergovchilarning qayd etishicha, Putinga yo‘llangan murojaatdagi Dadayevga nisbatan qo‘llanilgan qiynoqlar haqidagi ma’lumotlar ayblanuvchining avvalroq tergovgacha bo‘lgan arizasi doirasida o‘rganib chiqilgan va o‘z tasdig‘ini topmagan.
Izoh (0)