Россиянинг Красногорск шаҳридаги тўрт кишини ўлдиришда гумон қилинаётган Амиран Георгадзе бизнесдан чиқиш учун маҳаллий амалдорлардан 20 миллион доллар «товон пули» талаб қилган. Бу ҳақда «РБК» хабар бермоқда.
Бу ҳақда ҳуқуқни муҳофаза қилиш органларидаги манба «Интерфакс»га маълум қилган. Унинг қўшимча қилишича, ҳеч қандай пул ололмаган Георгадзе амалдорларни ўлдирган ва ўз жиноятини мобил телефонга суратга олган.
Манбанинг сўзларига кўра, «Георгадзе Москва вилоятининг энг нуфузли туманларидан бирида қурилиш ва турли ташкилотларга коммунал хизматларни кўрсатиш билан шуғулланиб келган, красногорсклик амалдорлар эса уни бу бизнесдан сиқиб чиқаришга уринган».
«Георгадзе Красногорск туманини ташлаб чиқишга тайёр бўлган, бироқ бунинг учун унга 20 миллион доллар тўлашлари керак, деб ҳисоблаган», — дейди «Интерфакс» манбаси.
19 октябрь куни Москва вилояти Красногорск тумани маъмурияти биносида туман маъмурияти раҳбарининг биринчи ўринбосари Юрий Караулов ва «Красногорск электр тармоқлари» корхонаси бошлиғи Георгий Котляренко ўлдириб кетилди. Бундан ташқари, қотилликда гумон қилинаётган Амиран Георгадзе тасодифий гувоҳни ва бизнес бўйича ўз ҳамкорини ҳам отиб ташлаган.
Изоҳ (0)