Мўғулистоннинг Селенге аймагида (провинция) археологлар тахмиман 1800 йиллик қабр топди. У сянбей сулоласига мансуб аслзодалардан бирига тегишли деб тахмин қилинмоқда. Бу ҳақда Anadolu хабар берди.
Таъкидланишича, бу топилма Мўғулистон ҳудудидан топилган сянбейлар даврига оид биринчи йирик ва “тегилмаган” тарихий аҳамиятга эга қабрдир. Тадқиқотчи археологлар ҳозирда қабрни қазиш ишларини давом эттирмоқда. Мутахассисларнинг фикрига кўра, топилма Ўрхун-Селенге ҳавзасида Сянбей давлатчилиги мавжудлиги ҳақидаги гипотезани тасдиқлайди.
Ёдгорлик биринчи марта 2019 йилнинг кузида Мўғулистон миллий университети ҳузуридаги кўчманчилар археологияси институти археологлари томонидан аниқланганди. 2022-2024 йилларда синчковлик билан 3D-ҳужжатлаштириш ишлари олиб борилган. Ҳозирда археологик қидирув ишлари ҳали ҳамон давом этмоқда, жумладан, бир даврга оид 3 та зодагоннинг қабри ва 2 та оддий тобут ўрганилмоқда.
Экспедиция раҳбари, тарих фанлари доктори ва археология кафедраси доценти Идерхангай Томор Очир ижтимоий тармоқларда қазишма майдонидан қалинлиги 7 см бўлган 2 та параллел ёғоч тобутдан иборат ажойиб артефактлар топилганини маълум қилган. Улардан бири кўк-сариқ матога маҳкам ўралган. Тобутнинг бош қисмида қора сиёҳ билан чизилган рамз ва нақшлар яхши ҳолатда сақланиб қолган. Шунингдек, қабрда иккита отнинг қолдиқлари, ёғоч арава ва сопол кўза шаклидаги ваза топилган. Бу қурбонлик қилинганидан далолат бериб турибди.
Археологларнинг таъкидлашича, бу қабрнинг тузилиши хуннлардан сянбей сулоласига ўтиш даврига оид. Хусусан, сянбейлар хуннлар қабрларига хос бўлган ходалар ётқизилган тўртбурчак чуқурдан фойдаланган. Шу билан бирга, ташқи тузилиш, жумладан, сув билан ўралган хандақ ва дўнглик сянбей меъморчилигига мос келади.
Мўғулистон Маданият вазирлиги, Маданий мерос миллий маркази ва бошқа ихтисослашган ташкилотлар мутахассислари артефактларни сақлаш ва реставрация қилиш ишларига жалб қилинган.
Изоҳ (0)