DА фуқаролар платформаси Молдавия президентлигига тўғридан-тўғри сайловлар ҳақида референдум ўтказиш учун имзо йиғишни бошлашни режалаштирмоқда. Бу ҳақда DА етакчиларидан бирига таяниб, «РИА Новости» хабар берди.
Унинг айтишича, DА (Demnitate si adevar — «Обрў ва ҳақиқат») платформаси Буюк миллий мажлиси Кенгаши 1 ноябрь куни чодирли шаҳарчада ушбу референдумга ташаббускорлик қилувчи гуруҳни шакллантириш бўйича йиғилиш ўтказилиши ҳақида қарор қилган.
Молдавия конституциясига кўра, президент ҳозирда парламент томонидан сайланади. Амалдаги давлат раҳбари Николай Тимофтининг президентлик муддати келаси йил мартда тугайди.
Кишинёвда бир ойдан буён мухолифат норозилик акцияларини ўтказмоқда, улар сўл марказчилар ва ўнг марказчилар учун иккита чодирли шаҳарчалар қурди. Намойишчилар бош вазир, президент ва бошқа қатор давлат арбобларининг истеъфосини, муддатидан олдинги сайловлар ўтказилишини, етакчи сиёсатчилар томонидан амалга оширилган эҳтимолий коррупциялар бўйича жиноий текширув бошлашни талаб қилмоқда.
Изоҳ (0)