Франциянинг EasyMile компанияси томонидан лойиҳалаштирилган EZ10 роботлаштирилган автобуслари Сингапурда ва АҚШнинг Калифорния штатида фойдаланишга топширилади. Бу ҳақда 3Dnews хабар бермоқда.
EZ10 — тўлиқ ўзи ҳаракатланувчи транспорт воситаси бўлиб, унинг ҳатто рули ҳам йўқ. У литий-ионли аккумляторлар блокидан қувват олувчи электр мотор ёрдамида ҳаракатга келади.
Бир марта тўлиқ қувватлантирилганидан сўнг, автобус тахминан 80 километр йўл боса олади, қувватни тиклаши учун эса саккиз соат вақт керак. Автобуснинг ўртача тезлиги соатига 20 километрни, энг юқори тезлиги эса соатига 40 километрни ташкил этади.
Мини-автобуслар кўпи билан 12 нафар йўловчини таший олади. Улар хотирасига аввалдан киритилган йўналиш бўйлаб ҳаракат қилади, тўқнашувлардан қочиш ва фавқулодда вазиятларга тўғри муносабат билдиришда унга лидар, видеокамералар, юқори аниқликдаги GPS сигналлари асосидаги навигация тизими, шунингдек, турли борт узатгичлари ёрдам беради.
Автобусни белгиланган йўналишдан ташқарига олиб чиқмоқчи бўлишса, у автоматик равишда тўхтайди. EasyMile EZ10 бошқарув маркази билан ахборотларни шифрланган кўринишда алмашади.
Робоавтобуслардан ҳозирча кенг миқёсда фойдаланиш имкони йўқ. Улар Сингапурда Gardens by the Bay футуристик парк мажмуаси ҳудуди бўйлаб ҳаракатланса, Калифорнияда Bishop Ranch бизнес-паркида фойдаланилади. Синовлар 2015 йил декабрида бошланади, 2016 йил ўрталаридан эса тўлақонли йўловчи ташиш ишлари бошланиши кутилмоқда.
Қўшимча сифатида қайд этиш жоиз, Франция, Финляндия, Италия, Испания ва Швейцарияда ҳам EasyMile EZ10 мини-автобусларидан фойдаланишни йўлга қўйиш бўйича лойиҳалар амалга оширилмоқда.
Изоҳ (0)