Америкалик тадқиқотчилар компьютер моделлаштириши ёрдамида президент Жон Кеннеди айнан Ли Харви Освальд томонидан ўлдирилгани далилини ҳақиқийлигини исботлади. Бу ҳақда Journal of Digital Forensics, Security and Law журналида чоп этилган мақолада ҳикоя қилинади.
Олимлар қотилликдан бир неча ой олдин Освальд милтиқ ушлаб турган ҳолатда (Кеннеди шу қурол билан ўлдирилган) тасвирланган «Орқа ҳовлидаги сурат» ҳақиқийлигини тасдиқлади. Олдинроқ айрим тадқиқотчилар Освальднинг туриши нотабиий эканлиги, соялар ва ёруғлик акс этганлиги туфайли сурат монтаж қилинганини таъкидлаб келар эди. Компьютер ёрдамида моделлаштириш айбланувчининг ўзини тутиши ҳамда соя ва ёруғлик тасвирида ҳеч қандай нотабиий ҳолат йўқлигини кўрсатди.
«Орқа ҳовлидаги сурат» қотилнинг турмуш ўртоғи Марина Освальд томонидан 1963 йил март ойи охирида эрининг фотоаппаратида олинган. Суратлардан бирида Освальд сўл йўналишдаги The Militant ва The Worker газеталари ҳамда милтиқ ушлаган ҳолатда тасвирланган. Мерганнинг ўзи қамоққа олинганидан сўнг суратлар қалбаки эканлигини даъво қилган эди.
Эслатиб ўтамиз, АҚШнинг 35-президенти 1963 йил 22 ноябрда Далласда ҳалок бўлганди. Унинг қотили деб топилган Ли Харви Освальд ҳам кўп ўтмай Жек Руби томонидан ўлдирилган.
Изоҳ (0)