Индонезиянинг Ява оролида 18 октябрь, якшанба куни юз берган ўрмон ёнғини оқибатида камида олти киши ҳалок бўлди, уч киши жиддий тан жароҳати олди. Бу ҳақда «ТАСС» хабар бермоқда.
Associated Press агентлиги томонидан 19 октябрь куни тарқатилган хабарга кўра, ёнғин баландлиги 3 минг метр бўлган тоғ қиялигидаги ўрмонли ҳудудда тўсатдан юз бериб, камида 12 кишидан иборат сайёҳлар гуруҳини ғафлатда қолдирган.
Ҳодиса оролнинг Шарқий ва Марказий вилоятлари чегарасида юз берган. Хабар беришларича, аланга ўчирилмаган гулхандан келиб чиққан бўлиши мумкин.
Маълумот учун, Индонезияда 17 октябрь куни ўрмон ёнғинларини ўчириш бўйича мамлакат тарихидаги энг йирик операция бошланди, унда ўн минглаб одамлар, шунингдек, 30 дан ортиқ авиатехника қатнашди.
Аввалроқ мамлакат президенти Жоко Видодо олов Калимантан ва Суматра оролларидаги 1,7 миллион гектар майдонни йўқ қилганини билдирганди. Ҳукумат маълумотларига кўра, ёнғинлар 28 миллион аҳоли турмушига таъсир қилган, 47,5 миллиард доллар зарар келтирган.
Изоҳ (0)