Бармоқ изи сканерига эга жаҳондаги энг арзон смартфон Тошкентда 760 минг сўмдан сотувга чиқди

Хитойнинг UMi компанияси Ўзбекистонда ўзининг янги хамёнбоп смартфони — Fair’нинг савдоларини бошлади. «Mobinfo.uz» хабарига кўра, корпуси атрофи металл гардиш билан ўралган қурилма бармоқ изи сканерига эга жаҳондаги энг арзон смартфон ҳисобланади.

UMi Fair частотаси 1,3 гигагерс бўлган 4 ядроли MediaTek MT6735, шунингдек, GPU Mali-Т720 процессори билан таъминланган. Қурилманинг 5 дюймли IPS-дисплейи ажрата олиши 1280х720 пиксел (HD), оператив хотираси сиғими 1, флеш-хотираси эса 8 гигабайтга тенг.

UMi Fair’нинг 8 мегапикселли асосий камераси Sony сенсори асосида ишлаб чиқилган, шунингдек, 2 мегапикселли олд камераси ҳам бор. Телефон сиғими 2250 мА/с бўлган аккумлятордан қувват олади.

UMi Fair’га иккита SIM-карта жойлаштириш мумкин, у 4G LTE ва 3G HSPA+ тармоқларида ишлай олади. Бундан ташқари, янги қурилма Wi-Fi 802.11b/g/n, Bluetooth 4.0 ва GPS модуллари билан таъминланган.

Ишлаб чиқарувчининг ўзи мазкур қурилмани оммабоп Xiaomi Redmi смартфонининг бевосита рақобатчиси, деб ҳисоблайди. Қайд этиш жоиз, Тошкентдаги «Малика» («Флешка») бозорида UMi Fair харидорларга 760 минг сўмдан таклиф қилинмоқда.