Xitoyning UMi kompaniyasi O‘zbekistonda o‘zining yangi xamyonbop smartfoni — Fair’ning savdolarini boshladi. “Mobinfo.uz” xabariga ko‘ra, korpusi atrofi metall gardish bilan o‘ralgan qurilma barmoq izi skaneriga ega jahondagi eng arzon smartfon hisoblanadi.
UMi Fair chastotasi 1,3 gigagers bo‘lgan 4 yadroli MediaTek MT6735, shuningdek, GPU Mali-T720 protsessori bilan ta’minlangan. Qurilmaning 5 dyuymli IPS-displeyi ajrata olishi 1280x720 piksel (HD), operativ xotirasi sig‘imi 1, flesh-xotirasi esa 8 gigabaytga teng.
UMi Fair’ning 8 megapikselli asosiy kamerasi Sony sensori asosida ishlab chiqilgan, shuningdek, 2 megapikselli old kamerasi ham bor. Telefon sig‘imi 2250 mA/s bo‘lgan akkumlyatordan quvvat oladi.
UMi Fair’ga ikkita SIM-karta joylashtirish mumkin, u 4G LTE va 3G HSPA+ tarmoqlarida ishlay oladi. Bundan tashqari, yangi qurilma Wi-Fi 802.11b/g/n, Bluetooth 4.0 va GPS modullari bilan ta’minlangan.
Ishlab chiqaruvchining o‘zi mazkur qurilmani ommabop Xiaomi Redmi smartfonining bevosita raqobatchisi, deb hisoblaydi. Qayd etish joiz, Toshkentdagi “Malika” (“Fleshka”) bozorida UMi Fair xaridorlarga 760 ming so‘mdan taklif qilinmoqda.
Izoh (0)