Volkswagen концерни Европа Иттифоқи ҳудудидан дизель двигателли 8,5 миллионга яқин автомобиль қайтариб олинишини маълум қилди. Бу ҳақда «ТАСС» хабар бермоқда.
Олдинроқ Германия расмийлари концерндан 7 октябрга қадар дизель двигателли машиналардаги нуқсонларни баратараф этиш режасини тақдим этишни талаб қилган эди. Германия транспорт ва рақамли инфраструктура вазири Александер Добриндт Volkswagen мамлакат автомобиль транспорти федераль агентлигига Европадан 8,5 миллионга яқин машина қайтариб олиниши ҳам кўзда тутилган мазкур режани топширганини тасдиқлади.
Унинг айтишича, агентлик ушбу ҳужжатни ўрганиб чиқиши учун маълум муддат талаб этилади. «Шундан сўнг Volkswagen амалга ошириши лозим бўлган чоралар бўйича қарор қабул қилинади ва тегишли кўрсатма берилади», дея таъкидлаган Добриндт.
Эслатиб ўтамиз, концерн вакиллари «дизелли можаро» бутун дунё бўйича 11 миллионта автомобилга тааллуқли бўлиши мумкинлигини маълум қилган.
Изоҳ (0)