Тошкент давлат аграр университети «Иновация ва интеграция маркази»да Тошкент давлат аграр университети ва Гулистон давлат университетида олимлари Халима Атабаева, Г.Миршарипова ва Б.Жумахановлар томонидан янги «Мальхотра» ва «Ҳалима» нўхат навлари яратилди. Бу ҳақда Тошкент давлат аграр университети «Дарё»га маълум қилди.
«Мальхотра» нўхат нави — Ўсимлик бутасимон, йиғиқ шаклда, баландлиги пояси яримштамп, тўғри тугалланган, яшил, қалин тукли. Қўлтиқ ости гуллари якка-якка, йирик, оқ. Дуккаги ромбсимон, ўткир учли, тукли. Дони бурчоқсимон, ғадир-будир, сарғиш-пушти. Бир тупда ўртача 80—86 дуккактагача ҳосил қилади. 1000 та доннинг вазни 377,0 грамм. Кечпишар, амал даври 108—111 кун. Ётиб қолиш, тўкилиш, қурғоқчилик ва дуккак ёрилишига бардошли, механизация билан йиғишга яхши мослашган, биологик кузги нав. Дон таркибидаги оқсил миқдори 24,3 %, мой миқдори 5,0—6,5 % ни ташкил этади. Пишиш даражаси 30 дақиқа, сифати бўйича қимматбаҳо нўхат навлари гуруҳига киради. Гектаридан 29—40 центнергача ҳосил олинади.
«Ҳалима» нўхат нави — Ўсимлик бутасимон шаклда, баландлиги 64 см, пояси штамп, тўғри тугалланган, яшил, тукли. Қўлтиқ ости гуллари якка-якка, йирик, оқ. Дуккаги ромбсимон, учли, тукли. Дони бурчоқсимон, ғадир-будир, сарғиш-пушти. Бир тупда ўртача 70—77 тагача дуккак ҳосил килади. 1000 та доннинг вазни 403,0 грамм. Кечпишар, амал даври 111—113 кун. Ётиб қолиш, тўкилиш, қурғоқчилик ва дуккак ёрилишига бардошли, механизация билан йиғишга яхши мослашган, биологик баҳорги нав. Дон таркибидаги оқсил миқдори 19,5—20 %, мой 5,5 % ни ташкил этади. Пишиш даражаси 30 дақиқа, сифати бўйича қимматбаҳо нўхат навлари гуруҳига киради. Гектаридан 25—30 центнергача ҳосил олинади.
Изоҳ (0)