Москванинг Тимирязев туман суди 15 октябрь, пайшанба куни Россия Либерал-демократик партияси етакчиси Владимир Жириновскийнинг Собиқ Иттифоқ собиқ президенти Михаил Горбачёв устидан даъвосини кўриб чиқишни кейинга қолдирди, дея хабар бермоқда «ТАСС».
Суд вакили маълум қилишича, суд Горбачёв вакилларининг илтимосини қондириб, эшитишни 29 октябрга қолдирган, улар Горбачёв суд мажлисида шахсан ўзи қатнашмоқчи эканлигини айтган.
Мажлис чоғида Горбачёв вакиллари сиёсатчининг хасталик туфайли судга кела олмаганини маълум қилди.
Эслатиб ўтамиз, Жириновскийнинг даъвоси Горбачёвнинг «Кремлдан сўнг» китоби чоп этилиши билан боғлиқ. Жириновскийнинг айтишича, китобда унинг экстремистик руҳдаги шиорлари ва провокацияларга алоқадорлиги тўғрисида сўз борган. Партия етакчисининг фикрига кўра, бу маълумотлар ҳақиқатга тўғри келмайди.
Даъво аризаси 7 сентябрь куни Москванинг Тимирязев туман судига берилган. Жириновский Горбачёвдан етказилган маънавий зарар учун 1 миллион рубль ва чоп этилган маълумотларга раддия беришни талаб қилмоқда.
Изоҳ (0)