Эрон президенти Ҳасан Руҳоний БМТ Бош Ассамблеясидаги нутқини Маккадаги тиқилинч чоғида зиёратчилар ўлимига йўл қўйган Ар-Риёдга қаратилган танқид билан бошлади. Эрон президентининг чиқиши БМТнинг YouTube’даги каналига жойланди.
Руҳоний АҚШни террорчилик сиёсатида айблади — Эрон етакчиси Американинг Ироқ ва Афғонистонга бостириб боришини, Фаластин халқига жабр-зулм қиладиган сионистик режимни қўллаб-қувватлашини айнан шундай таърифлади.
Атом бўйича якуний битимни Эрон президенти Яқин Шарққа тинчлик ва барқарорлик келтирган «уруш устидан ғалаба» деб атади.
Аввалроқ Эрон президенти Ҳасан Руҳоний Маккадаги ҳаж зиёрати чоғида Эрон фуқаролари ҳалок бўлгани туфайли, ўзининг БМТ Бош ассамблеясига ташрифини тўхтатиб, Теҳронга қайтиши хабар берилган эди. Ҳалок бўлган зиёратчиларнинг жасадлари ортилган биринчи самолёт Теҳронга 29 сентябрь куни етиб келади, шу туфайли Руҳоний АҚШни бир кун аввал тарк этади.
Маккадаги тиқилинч натижасида жами 769 киши қурбон бўлган. Улардан 169 нафари эронликлардир. Шунингдек, яна мамлакатнинг 300 га яқин фуқароси бедарак йўқолган деб эълон қилинган.
Изоҳ (0)