Данияда 110 йил аввал ишлаб чиқарилган электромобил сотилди

Буюк Британиянинг Bonhams аукцион уйи Эбелтофтда (Дания) 1905 йилда ишлаб чиқарилган Woods Electric Style 214A Queen Victoria Brougham электромобилини кимошди савдоси орқали номаълум харидорга сотди. Бу ҳақда Interfax хабар бермоқда.

Gizmag нашри маълумотларига кўра, автомобиль 632,5 минг Дания кронаси эвазига (95 минг доллар атрофида) харидорини топган. Электромобил 1905 йилда уч минг доллар (ҳозирги нархларда 74-75 минг долларга яқин) турган. Мазкур автомобиль АҚШнинг Woods Motor Vehicle Company компанияси томонидан ишлаб чиқарилган шундай турдаги ягона сақланиб қолган машина саналади. 1899 йили Чикагода асос солинган компания йилига 500 дона электромобил ишлаб чиқарган, бироқ 1918 йилда йўналишини бензинли ва гибрид автомобиллар ишлаб чиқаришга ўзгартиролмай, касод бўлганди.

XIX аср охири —ХХ аср бошларида электромобиллар бозори анча ривожланган бўлиб, биргина АҚШнинг ўзида 1900 йили 30 мингта шундай машина ҳаракатда бўлган. 1910 йилга келиб эса Нью-Йоркда салкам 70 мингта электромобил такси сифатида фойдаланилган.

1899 йили La Jamais Contente соатига 105,9 километр тезликка эришиб, бундай кўрсаткични қайд этган биринчи автомобиль бўлганди.