Volkswagen бошқаруви раиси Мартин Винтеркорн лавозимини тарк этади. Бу ҳақда концерн кузатув кенгашининг Вольфсбургда бўлиб ўтган йиғилишидан сўнг эълон қилинди. Янги раҳбарнинг тайинланиши тўғрисидаги қарор 25 сентябрь, жума куни қабул қилиниши кутилмоқда, дея хабар бермоқда «ТАСС».
68 ёшли Винтеркорн «дизелли можаро» туфайли танқид остида қолди. Маълум бўлишича, дизел двигателли автомобилларнинг борт компьютерига машинадан чиқаётган зарарли моддалар кўрсаткичини камайтириб кўрсатувчи дастурий илова ўрнатилган экан.
«Volkswagen концернида бундай кўламдаги камчиликлар рўй бериши мумкинлиги мени эсанкиратиб қўйди, — дея таъкидлади Винтеркорн. — Кузатув кенгашидан бошқарув раиси ваколатини зиммамдан соқит қилишни сўрадим. Гарчи нотўғри хатти-ҳаракатларга йўл қўймаган бўлсам-да, компания манфаатларини кўзлаб шундай қарорга келдим».
Эслатиб ўтамиз, ўтган ҳафтада АҚШ расмийлари концернга ушбу мамлакат бозорида 2009-2015 йилларда сотилган 482 минг дизел двигателли Volkswagen ва Audi енгил машиналарини қайтариб олиш мажбуриятини юклади. Автогигантга солиниши мумкин бўлган жарима миқдори 18 миллиард долларга етиши мумкин. Европа ва Осиёда ҳам концернга нисбатан суриштирув бошланди.
ОАВ Porsche бўлинмаси етакчиси Маттиас Мюллер Volkswagen раҳбари этиб тайинланиши мумкинлиги ҳақида тахмин қилмоқда.
Изоҳ (0)