Buyuk Britaniyaning Bonhams auksion uyi Ebeltoftda (Daniya) 1905-yilda ishlab chiqarilgan Woods Electric Style 214A Queen Victoria Brougham elektromobilini kimoshdi savdosi orqali noma’lum xaridorga sotdi. Bu haqda Interfax xabar bermoqda.
Gizmag nashri ma’lumotlariga ko‘ra, avtomobil 632,5 ming Daniya kronasi evaziga (95 ming dollar atrofida) xaridorini topgan. Elektromobil 1905-yilda uch ming dollar (hozirgi narxlarda 74-75 ming dollarga yaqin) turgan. Mazkur avtomobil AQShning Woods Motor Vehicle Company kompaniyasi tomonidan ishlab chiqarilgan shunday turdagi yagona saqlanib qolgan mashina sanaladi. 1899-yili Chikagoda asos solingan kompaniya yiliga 500 dona elektromobil ishlab chiqargan, biroq 1918-yilda yo‘nalishini benzinli va gibrid avtomobillar ishlab chiqarishga o‘zgartirolmay, kasod bo‘lgandi.
XIX asr oxiri —XX asr boshlarida elektromobillar bozori ancha rivojlangan bo‘lib, birgina AQShning o‘zida 1900-yili 30 mingta shunday mashina harakatda bo‘lgan. 1910-yilga kelib esa Nyu-Yorkda salkam 70 mingta elektromobil taksi sifatida foydalanilgan.
1899-yili La Jamais Contente soatiga 105,9 kilometr tezlikka erishib, bunday ko‘rsatkichni qayd etgan birinchi avtomobil bo‘lgandi.
Izoh (0)