Францияда чоп этилувчи Charlie Hebdo сатирик ҳафтаномасини январь ойидаги терактдан омон қолган икки ходим тарк этади. Бу ҳақда «Корреспондент.net» хабар бермоқда.
Таҳририятнинг бадиий раҳбари, Луз ижодий тахаллуси билан танилган Ренальд Лузье нашрни келаси ҳафтадаёқ тарк этишини маълум қилди. Луз нашрдаги аксарият карикатураларнинг, хусусан, таҳририятга уюштирилган террорчилик ҳужумига сабаб бўлган Муҳаммад пайғамбарга чизилган ҳажв-суратларнинг ҳам муаллифи эди.
Райтер Патрик Пеллунинг сўзларига кўра, у таҳририятни келаси йил бошида тарк этади. «Агар мен ёзишни тўхтатган бўлсам, бу бирор нарса якунига етганидан далолат. Террорчиларнинг қўлида ҳалок бўлишдан омон қолганлар ҳақиқатан ҳам омон қолган ҳисобланмайди, бу ҳужумдан сўнг бизнинг бир қисмимиз ўлиб бўлди», — деди журналист.
Charlie Hebdo журналининг таҳририят сиёсати ҳазиллар учун ҳеч қандай тақиқ йўқлигига асосланган. Кўпинча таҳқирли ва оғриқли чиқадиган карикатуралар қаҳрамони сифатида Рим папаси ва турли мамлакатларнинг етакчилари танланади.
2015 йил январида, журналда Муҳаммад пайғамбарга чизилган таҳқирли карикатуралар эълон қилинганидан сўнг, «Арабистон яриморолидаги Ал-Қоида» буюртмасига асосан Charlie Hebdo таҳририятига қуролли ҳужум уюштирилган, оқибатда 12 киши ҳалок бўлганди.
Изоҳ (0)