Fransiyada chop etiluvchi Charlie Hebdo satirik haftanomasini yanvar oyidagi teraktdan omon qolgan ikki xodim tark etadi. Bu haqda “Korrespondent.net” xabar bermoqda.
Tahririyatning badiiy rahbari, Luz ijodiy taxallusi bilan tanilgan Renald Luzye nashrni kelasi haftadayoq tark etishini ma’lum qildi. Luz nashrdagi aksariyat karikaturalarning, xususan, tahririyatga uyushtirilgan terrorchilik hujumiga sabab bo‘lgan Muhammad payg‘ambarga chizilgan hajv-suratlarning ham muallifi edi.
Rayter Patrik Pelluning so‘zlariga ko‘ra, u tahririyatni kelasi yil boshida tark etadi. “Agar men yozishni to‘xtatgan bo‘lsam, bu biror narsa yakuniga yetganidan dalolat. Terrorchilarning qo‘lida halok bo‘lishdan omon qolganlar haqiqatan ham omon qolgan hisoblanmaydi, bu hujumdan so‘ng bizning bir qismimiz o‘lib bo‘ldi”, — dedi jurnalist.
Charlie Hebdo jurnalining tahririyat siyosati hazillar uchun hech qanday taqiq yo‘qligiga asoslangan. Ko‘pincha tahqirli va og‘riqli chiqadigan karikaturalar qahramoni sifatida Rim papasi va turli mamlakatlarning yetakchilari tanlanadi.
2015-yil yanvarida, jurnalda Muhammad payg‘ambarga chizilgan tahqirli karikaturalar e’lon qilinganidan so‘ng, “Arabiston yarimorolidagi Al-Qoida” buyurtmasiga asosan Charlie Hebdo tahririyatiga qurolli hujum uyushtirilgan, oqibatda 12 kishi halok bo‘lgandi.
Izoh (0)