Германия канцлери Ангела Меркель БМТ Хавфсизлик кенгашини замонавий дунёда ҳокимиятнинг тақсимланишини ҳисобга олган ҳолда қайта шакллантириш зарурлигини маълум қилди. Меркель бу ҳақда Бразилия, Ҳиндистон ва Япония вакиллари билан бўлиб ўтган учрашув вақтида маълум қилган, деб хабар беради «РБК».
«Бизга масалаларни ҳал этишнинг янги услуби керак. Бу эса Хавфсизлик кенгаши ислоҳот ўтказиши кераклиги ва бу жаҳондаги ҳокимият тақсимланишини нисбатан ҳаққоний акс эттириб бера олиши зарурлигини билдиради», — деди Германия ҳукумати раҳбари.
Германия канцлерининг сўзларига кўра, мазкур мақсадга эришиш учун «иттифоқчиларни топиш» ва «жуда донолик билан ҳаракат қилиш лозим».
«Ҳозирги кунда нафақат Германия, Бразилия, Ҳиндистон ва Япония, балки кўплаб бошқа мамлакатлар ҳам Хавфсизлик кенгашининг тузилмаси ва фаолиятидан қониқиш ҳосил қилмаяпти. Хавфсизлик кенгашининг замонавий, XXI асрга мос келадиган ишчи тузилмасини ташкил этиш учун бошқа мамлакатлар ҳам бизга қўшилишларини истаймиз», — деди Меркель.
Reuters’нинг ёзишича, вето ҳуқуқига эга беш мамлакат — АҚШ, Буюк Британия, Франция, Россия ва Хитой БМТ Хавфсизлик кенгашининг доимий аъзоси ҳисобланади.
Изоҳ (0)