АҚШнинг Флорида штатида 20 ёшли аёл денгиз тошбақасини миниб юрганликда гумон қилиниб, ҳибсга олинди. Бу ҳақда 26 сентябрь, шанба куни Reuters агентлиги хабар берди.
Жиноят иши Флорида балиқлар ва ёввойи табиатни муҳофаза қилиш комиссиясининг шикояти асосида қўзғатилган. Маълум бўлишича, ижтимоий тармоқларда кенг тарқалиб кетган суратлар комиссия эътиборини жалб қилган.
Суратларда гумонланувчи Стафани Мур ва шахси номаълум бўлган яна бир ёш аёл соҳилда денгиз тошбақасини миниб сайр қилаётгани тасвирланган. Фотосуратлар июлнинг бошида Facebook ижтимоий тармоғида эълон қилинган ва кескин норозиликка сабаб бўлган.
Мур 26 сентябрь куни тонгда, унинг Мельбурн (Флорида) шаҳридаги уйидан полицияга шикоят тушганидан сўнг ҳибсга олинди. Ҳодиса жойига етиб келган тартиб посбонлари аёл денгиз тошбақаси иши бўйича гумонланувчи эканлигини аниқлаб, уни қўлга олди.
Мельбурн полиция департаментидан маълум қилишларича, Стафани Мур «Денгиз тошбақасига эгалик қилиш, сотиш ёки тинчлигини бузиш» моддаси бўйича айбланмоқда.
Изоҳ (0)