Саудия Арабистонининг Макка шаҳрида рўй берган фожиа, шунингдек, бу йилги ҳаж маросими чоғида бўлиб ўтган бошқа нохуш ҳодисалар текширилиши лозим. Бу ҳақда Эрон президенти Ҳасан Руҳоний 26 сентябрь, шанба куни БМТнинг Барқарор ривожланиш бўйича саммитидаги чиқишида маълум қилди, дея хабар беради «ТАСС».
«Маккада минглаб мусулмонлар, жумладан, эронликлар билан юз берган қайғули ҳодиса муносабати билан афсусда эканлигимни айтиб ўтмоқчиман. Бу фожиада ҳалок бўлганларнинг оиласига чуқур ҳамдардлик изҳор этаман», — дея сўз бошлаган Руҳоний бу йилги ҳаж маросимида рўй берган мазкур ва бошқа воқеалар текширилиши муҳимлигини таъкидлаган.
Эрон ҳаж ва зиёрат ташкилоти раҳбари Саид Охади Маккадаги фожиа Саудия Арабистони расмийлари томонидан ҳаж зиёрати қониқарсиз ташкиллаштирилгани туфайли содир бўлганини билдирган.
Эслатиб ўтамиз, Саудия Арабистони соғлиқни сақлаш вазири Холиди ал-Фалиҳ Макка яқинидаги Мино водийсида юз берган тирбандлик оқибатида ҳалок бўлганлар сони 769 кишига етганини маълум қилди.
Изоҳ (0)