Қирғизистон миллий хавфсизлик давлат қўмитаси (МХДҚ) парламент сайловлари вақтида республика давлат идоралари сайтларига хакерлик ҳужумлари уюштирилиши эҳтимолини инкор этмаяпти ва уларнинг олдини олишга тайёргарлик кўрмоқда. Бу ҳақда, «РИА Новости» хабарига кўра, МХДҚ раҳбари Бусурманқул Табалдиев маълум қилди.
«МХДҚ сайлов кунлари хакерлик ҳужумлари рўй бермаслиги устида ишламоқда», — деди идора раҳбари парламент сайловлари даврида хавфсизлик ва тартибни сақлаш бўйича кенгаш мажлисида.
«Биз Марказий Осиё минтақасида биринчи бўлиб биометрик маълумотлар асосида сайловларни уюштиряпмиз, шу сабабли ҳам халқаро кузатувчилар томонидан юқори даражада эътибор қаратилмоқда. Бизнинг вазифамиз — ҳаққоний ва шаффоф сайловларни ўтказиш», — деди Қирғизистон бош вазири Темир Сариев.
Қирғизистон парламентига сайловлар 2015 йил 4 октябрь куни бўлиб ўтади. Сайлов иштирок этиш истагини 34 та партия билдирган бўлса-да, фақат 14 та партия сайловга қўйилди.
Мазкур сайлов Қирғизистон тарихида илк бор аҳолининг биометрик маълумотлари асосида тузилган рўйхат асосида ўтказилади. Барча сайлов участкаларига электрон ҳисобловчи урналар жойлаштирилган бўлиб, улар сайлов якунлари ҳақидаги ахборотни автоматик тартибда Марказий сайлов комиссиясига жўнатади.
Изоҳ (0)