АҚШнинг «Инсонлар жониворлар билан шафқатли муносабатда бўлиш тарафдори» (PETA) ташкилоти Наруто лақабли пахмоқ павианни ўзи суратга туширган фотонинг муаллифи сифатида тан олиш ва бу суратдан фойдаланганлик учун компенсация тўланишини даъво қилиб, Сан-Франциско судига ариза берди. Бу ҳақда «ТАСС» хабар бермоқда.
Аризада кўрсатилишича, 2011 йили британиялик фотограф Дэвид Слейтер Индонезиядаги табиатни қўриқлаш мажмуига маймунларни суратга тушириш учун боради. Унинг эътиборсиз қолдирилган фотоаппарати бу ерда истиқомат қиладиган Нарутонинг қўлига тушиб, маймун тасодифан камера тугмасини босиб юборади ва бир неча сурат, жумладан, машҳур «селфи»ни ҳам олишга муваффақ бўлади.
Мазкур сурат Слейтернинг 2014 йилда Американинг Blurb ноширлик компанияси томонидан чоп этилган китобидан ўрин олди. Унда суратнинг муаллифлик ҳуқуқи фотограф ва унинг иш берувчи — Буюк Британиянинг Wildlife Personalities компаниясига тегишли экани билдирилган.
PETA пахмоқ павианни суратнинг ягона муаллифлик ҳуқуқи эгаси сифатида тан олиш, жавобгарлар — фотограф, унинг компанияси ва нашриётдан сурат чоп этилишидан тушган даромадни маймунга тўлаб беришни талаб қилмоқда. Аризада кўрсатилганидек, «мазкур маблағлар Наруто, унинг оиласи ва у мансуб бўлган маймунлар тури манфаатлари учун ишлатилиши лозим».
Пахмоқ павианлар фақат Индонезиядаги Сулавеси ва унга қўшни оролларда сақланиб қолган, уларнинг сони 4—6 мингдан ошмайди.
Изоҳ (0)