Forbes танлови бўйича Россия бойлари орасида 13-ўринда турувчи миллиардер Андрей Мельниченко учун қурилган жаҳондаги энг катта Sailing Yacht A елканли яхтаси сувга туширилди ва Германия шимолида синовдан ўтказилмоқда. Бу ҳақда «Газета.ru» хабар бермоқда.
Яхтанинг узунлиги 142 метр, баландлиги эса 91 метрга яқин. Жаҳондаги энг катта елканли кеманинг умумий майдони 1767 квадрат метрга тенг бўлиб, унда саккизта палуба ва битта сувости томоша майдончаси бор. Яхтанинг баҳоси тахминан 404 миллион долларга тенг. У 20 нафар меҳмон ва экипажнинг 54 нафар аъзосига мўлжалланган.
Елканлардан ташқари ушбу яхта соатига 24 миль тезликда ҳаракатланиш имконини берувчи дизель-электр гибрид двигатель билан таъминланган. Қайд этишларича, Мельниченконинг «А» номли мегаяхтаси ҳам бор, бироқ у елканли эмас, моторли эди.
The Telegraph’нинг қайд этишича, елкансиз яхталар орасида катталиги бўйича иккинчи ўринда турувчи, узунлиги 163 метр бўлган Eclipse ҳам бошқа бир россиялик миллиардер — Роман Абрамовичга тегишли.
Изоҳ (0)