23 сентябрь куни Россия Федерацияси пойтахтининг «Проспект мира» даҳасида янгидан бунёд этилган Москва жомеъ масжидининг тантанали очилиш маросими ўтказилади, дея хабар бермоқда Ўзбекистон Мусулмонлари идораси матбуот хизмати.
Масжиднинг тантанали очилиш маросимига Россия Федерацияси муфтийлар кенгашининг раиси, Россия мусулмонлари диний идораси раиси, муфтий шайх Равил Гайнутдин таклифига биноан Вазирлар Маҳкамаси ҳузуридаги Дин ишлари бўйича қўмита Масжидлар бўлими бошлиғи М.Б. Йўлдошев ва Ўзбекистон мусулмонлари идораси Матбуот котиби Ж. Нуриддинов 22 сентябрь куни эрталаб Москва шаҳрига жўнаб кетди.
Янгидан бунёд этилган масжид фашизм устидан қозонилган Ғалабанинг 70 йиллигига бағишланади. 111 йил аввал қурилган масжиднинг янгиланган жомеъ масжиди – Россиянинг Бош масжиди ўз эшикларини пойтахт мусулмонлари ва меҳмонлари учун очмоқда.
Эслатиб ўтамиз, аввалроқ Россия президенти Владимир Путин ва хорижий давлатлар раҳбарлари иштирокида Москва жомеъ масжидининг тантанали очилиш маросими бўлиб ўтиши хабар берилган эди.
Изоҳ (0)