2015 йил 15 сентябрь куни Ўзбекистон Миллий кутубхонасида инглиз ёзувчиси, дунёда Агата Кристи номи билан танилган Агата Мери Кларисса Маллоуэн таваллудининг 125 йиллигига бағишланган «Изқуварлик жанри устаси» деб номланган китоб кўргазмаси очилди. Бу ҳақда Алишер Навоий номидаги Ўзбекистон Миллий кутубхонаси матбуот хизмати хабар бермоқда.
Агата Кристи ўзи яратган 80 детектив роман, 6 психологик роман, 19 та ҳикоялар тўплами ва бугунги кунда ҳам ўз машҳурлигини йўқотмаган ва дунё театрларида саҳналаштириб келинаётган кўплаб пьесалари туфайли энг таниқли детектив (изқувар) асарлар ёзувчилари сирасига киради.
Прозанавис ва драматург Агата Мэри Кларисса Маллоуэн 1890 йил 15 сентябрь куни Торки шаҳри, Девон графлигида (Буюк Британия) таваллуд топган.
Инглиз детектив асарлар усталари анъанасини давом эттирган ҳолда у 33 та роман, 1 та песа ва 54 та ҳикоялар қаҳрамони бельгиялик моҳир изқувар Эркюль Пуаро ва 12 та романининг қаҳрамони бўлган Сент-Мери-Мид инглиз қишлоқчаси фуқароси, ҳаваскор-изқувар мисс Марпл образларини яратди.
Агата Кристи таваллудининг 125 йиллигига бағишланган мазкур кўргазмада детектив жанри китобхонларига аудио китоблар, машҳур пьесалар тўплами, шунингдек, журналларда чоп этилган асарлари ҳавола этилган.
Изоҳ (0)