Дунёнинг етакчи футболчиларидан олинган допинг-тестлар таҳлили 68 нафар ўйинчи тақиқланган анаболик стероидлардан фойдаланганини кўрсатди. Бу ҳақда The Sunday Times маълумотларига асосланиб, «ТАСС» хабар бермоқда.
Олимлар Европа футбол ассоциациялари уюшмаси (УЕФА) илтимосига кўра, Англия, Испания, Италия ва Германиядаги етакчи клубларда тўп сураётган, Чемпионлар Лигаси ҳамда Европа Лигаси, шунингдек, 2008—2013 йилларда ўтказилган Европа чемпионатларида қатнашган профессионал футболчилардан олинган 4 мингдан ортиқ пешоб таҳлилини ўрганиб чиққан. Уларнинг натижасига кўра, 879 нафар футболчидан 68 нафари допинг-тестда «йиқилган».
«Натижалар аниқ бўлса, Европадаги муҳим мусобақалар иштирокчилари орасида тақиқланган дори-дармонлар истеъмол қилиниши ошкор этилганини англатади. Бу эса футболда жиддий муаммолар мавжудлигидан далолатдир», — дея таъкидлаган Ғарбий Шотландия университети профессори Жульен Бейкер.
Текширувлар аноним тарзда ўтказилгани учун мазкур футболчиларга нисбатан суриштирув бошланмайди.
Изоҳ (0)