Dunyoning yetakchi futbolchilaridan olingan doping-testlar tahlili 68 nafar o‘yinchi taqiqlangan anabolik steroidlardan foydalanganini ko‘rsatdi. Bu haqda The Sunday Times ma’lumotlariga asoslanib, “TASS” xabar bermoqda.
Olimlar Yevropa futbol assotsiatsiyalari uyushmasi (UEFA) iltimosiga ko‘ra, Angliya, Ispaniya, Italiya va Germaniyadagi yetakchi klublarda to‘p surayotgan, Chempionlar Ligasi hamda Yevropa Ligasi, shuningdek, 2008—2013-yillarda o‘tkazilgan Yevropa chempionatlarida qatnashgan professional futbolchilardan olingan 4 mingdan ortiq peshob tahlilini o‘rganib chiqqan. Ularning natijasiga ko‘ra, 879 nafar futbolchidan 68 nafari doping-testda “yiqilgan”.
“Natijalar aniq bo‘lsa, Yevropadagi muhim musobaqalar ishtirokchilari orasida taqiqlangan dori-darmonlar iste’mol qilinishi oshkor etilganini anglatadi. Bu esa futbolda jiddiy muammolar mavjudligidan dalolatdir”, — deya ta’kidlagan G‘arbiy Shotlandiya universiteti professori Julyen Beyker.
Tekshiruvlar anonim tarzda o‘tkazilgani uchun mazkur futbolchilarga nisbatan surishtiruv boshlanmaydi.
Izoh (0)