«Локомотив» ҳимоячиси Виталий Денисов «Рубин»га қарши кечган учрашувда ножўя гап ишлатганини тан олди, аммо футболчи бу гап аниқ кимгадир қаратилмаганини билдирди, дея хабар бермоқда «Uff.uz». Футболчи бу ҳақда Интизом қўмитасига тушунтириш хати ёзган.
«Майдон четига югуриб келар эканман, бош мураббийдан захира алмаштириши бўлмаслигини эшитдим. Орадан бир неча сония ўтгач, захира футболчилари ўтирган томондан кимдир гапирганини эшитдим. Унинг гапи «ортингга сур», деган маънода эди. Менинг эътиборим бош мураббий ва тўртинчи ҳакамга қаратилгани боис, бу гап кимдан чиққанини аниқ кўра олмадим.
Майдонга қайтар эканман, захира ўриндиғига тескари бурилган ҳолда, ўша вазиятдан ва кимдир менга бу тариқа буйруқ бераётганидан жаҳлим чиқиб кетди ва ҳиссиётларимни жиловлай олмай, ножўя гап айтиб юбордим.
Мен бу билан ҳеч кимни ҳақорат қилмоқчи эмас эдим. Ножўя гап эса бехосдан ишлатилди ва у орқали кимнидир ерга урмоқчи эмас эдим. Бўлиб ўтган ишдан жуда афсусдаман ва узр сўрайман. Аммо яна бир бор таъкидлаб ўтишим лозим, мен бу гап билан аниқ бирор кимсани ҳақорат қилмоқчи бўлмаганман», — дейилади Виталий Денисов томонидан қилинган баёнотда.
Нашр эслатишича, Виталий Денисов Интизом қўмитаси томонидан 60 минг рубль миқдорида жаримага тортилган.
Изоҳ (0)