«Пахтакор» футбол клуби «Локомотив» бош мураббийи Вадим Абрамовга миннатдорчилик билдирди

Футбол бўйича Ўзбекистон Олий Лигаси 21-туридан ўрин олган «Пахтакор» — «Локомотив» учрашувидан сўнг «темирйўлчилар» бош мураббийи Вадим Абрамов «Пахтакор»ни чемпионлик билан табриклаш мумкинлигини айтиб ўтган эди. «Uff.uz» хабарига кўра, «Пахтакор» клуби Абрамовнинг мазкур фикрига жавобан расмий баёнот берди.

«Пахтакор»нинг 2:1 ҳисобидаги ғалабаси билан якунланган беллашувдан сўнг «Локомотив» бош мураббийи матбуот анжуманида «Пахтакор»ни муддатидан олдин чемпионлик билан табриклади. Ўтган мавсумда ҳам у чемпионат тугашига тўрт тур қолганда, жамоамиз ўзаро баҳсда 3:1 ҳисобида зафар қучгач, «Пахтакор»ни чемпионлик билан табриклаганди», — дейилади «Пахтакор» баёнотида.

«Биз бу сафар ҳам унинг башорати амалга ошишини хоҳлаймиз. У жамоамиз ғалабаларини олдиндан айтиб берувчи тимсолга айланиб бормоқда. Биз яна бир бор савиямизни намойиш қилиб, шонли ва ғалабали анъанамизни давом эттиришга ҳаракат қиламиз. Рақиб жамоа мураббийига эса, фаолиятини давом эттирган тақдирда, у бошқарадиган ҳар бир жамоа «Пахтакор» каби — нафақат 90 дақиқа, балки қўшимча дақиқаларда ҳам курашиш ҳислатини тилаб қоламиз. Фақат шундагина натижага эришиш мумкин», — дейилади «Пахтакор» баёнотида.