Махачқалъа шаҳри (Россия)да бокс бўйича анъанавий тарзда ўтказиладиган халқаро турнир бўлиб ўтди, деб хабар беради Ўзбекистон Миллий олимпия қўмитаси матбуот хизмати.
Ўн еттинчи бор ташкил этилган мазкур мусобақада 16 давлатдан (Ўзбекистон, Австралия, Польша, Озарбайжон, Қозоғистон, Латвия, Молдавия, Украина, Беларусь, Арманистон, Тожикистон, Испания, КХДР, Швеция, Эстония, шунингдек, Россиянинг турли ҳудудларидан) 198 нафар боксчи ғолиблик учун кураш олиб борди.
Мазкур халқаро турнирда асосан иккинчи таркиб билан иштирок этган Ўзбекистон терма жамоаси 1 та олтин, 5 та кумуш ва 1 та бронза медалини қўлга киритган ҳолда умумжамоа ҳисобида иккинчи ўринни эгаллади. Биринчи ўринга Россия терма жамоаси сазовор бўлган бўлса, учинчи ўринни КХДР терма жамоаси банд этди.
Ўзбекистон ҳисобига олтин медални Абдулхай Шорахматов (-56 кг) келтирган бўлса, Абдулла Қўчқоров (-49 кг), Азизбек Отажонов (-52 кг), Анвар Туропов (-64 кг), Акмалбек Қосимов (-75 кг) ва Улуғбек Мубинов (+91 кг) кумуш, Сардор Музаффаров (-56 кг) эса бронза медали билан тақдирланди.
Изоҳ (0)