Мексика ҳукумати сайёҳлар гуруҳидан бўлган саккиз нафар фуқароси Миср марказидаги чўлда хатолик туфайли мисрлик ҳарбийлар томонидан отиб ташланганини тасдиқлади, дея хабар бермоқда «ТАСС» мексикаликларни хорижда ҳимоя қилиш бўйича бошқарма раҳбарига таяниб.
Унинг айтишича, 13 сентябрь куни ҳарбийлар ҳужумига учраган гуруҳда 14 нафар мексикалик сайёҳ бўлган. Уларнинг олти нафари айни пайтда Қоҳира ташқарисидаги касалхонада ётибди, уларнинг аҳволи барқарор дея баҳоланмоқда.
Аввалроқ Миср Ички ишлар вазирлиги 12 киши, хусусан, мексикалик сайёҳлар ва уларга ҳамроҳлик қилаётган мисрлик гидлар куч тузилмалари ходимлари томонидан отиб ўлдирилгани, сайёҳлик гуруҳининг ўн аъзоси тан жароҳати олгани ҳақида хабар берганди. Хавфсизлик хизмати ходимлари туристларни террорчи деб ўйлаган.
Кейинроқ Мексика Миср ҳукуматидан мисрлик полициячилар томонидан ўққа тутилган мексикалик сайёҳларнинг ўлими билан боғлиқ вазиятни изчил тергов қилишни талаб этди.
Миср ИИВнинг аниқлик киритишича, ҳодиса Шарқий саҳродаги Ал-Ваҳат ҳудудида, полиция ва армия кучлари террорчиларни таъқиб этаётган вақтда юз берган. Туристлар гуруҳи таркибида бошқа мамлакатларнинг вакиллари бор-йўқлиги ҳақида ҳозирча ахборот келиб тушгани йўқ.
Изоҳ (0)