Ўта оғир вазнда Халқаро бокс ассосиацияси (WBA) йўналиши бўйича жаҳон чемпиони, ўзбекистонлик Руслан Чагаев Чеченистон раҳбари Рамзан Қодиров билан учрашгунига қадар спортдаги фаолиятини якунламоқчи бўлганини маълум қилди. Бу ҳақда «TASS» хабар бермоқда.
«Боксда сени бирон-бир ҳаракатга ундаб турадиган кишилар бўлади. Менинг мисолимда Рамзан Аҳмадович шундай инсон бўлиб чиқди, — дея ҳикоя қилади Чагаев. — У билан учрашгунча, ўзимни боксчилар сафидан чиқаришга улгургандим. Аммо у фаолиятни тугатишимга эрта эканлиги ва ҳали кўп нарсаларга қодирлигимга ишонтирди».
Эслатиб ўтамиз, Чагаев 2014 йил ёзида бир йиллик танаффусдан сўнг, рингга қайтган ва Грозний шаҳрида бўлиб ўтган жаҳон чемпионлиги учун баҳсда Пуэрто-риколик Фрес Окендо устидан ғалаба қозонганди.
Шу йил 11 июлда бўлиб ўтган охирги баҳсида Чагаев биринчи раунддаёқ италиялик Франческо Пьянетани нокаутга учратди. Унинг навбатдаги беллашуви 17 октябрда Германиянинг Кил шаҳрида бўлиб ўтиши белгиланган: Руслан Фрес Окендога қарши реванш жангини ўтказади.
Изоҳ (0)