Арманистон электр энергия тарифлари қимматлашувига қарши чиқаётган «Йўқолсин ўғирлик» ҳаракати фаоллари пойтахт Еревандаги Президент саройи жойлашган Баграмян марказий шоҳкўчасини тўсиб қўйди. Бу ҳақда «Ведомости» хабар бермоқда.
Шоҳкўча яқинидаги Озодлик майдонида бўлиб ўтган қисқа митингдан сўнг 2000 киши юриш уюштирди. Президент саройига олиб борадиган йўлни полиция ходимлари ёпиб қўйганидан сўнг, намойишчилар йўлга ўтириб олди, транспортлар ҳаракати ишдан чиқди.
11 сентябрь, жума куни ҳаракат фаоллари норозилик намойишларини қайта бошлаш ниятида эканликларини маълум қилганди. Уларнинг сўзларига кўра, ҳукумат энергия тарифлари қимматлашуви харажатларини қоплаб бериш ҳақидаги ваъдаларини бажармаган.
Аввалроқ Арманистонда 1 августдан 1 киловатт-соат электр энергия нархини 6,93 драмга ошириш ҳақида қарор қабул қилинган эди. Бунгача кундузги вақтда 1 киловатт электр нархи 41,85 драм, тунги вақтда эса 31,85 драмга тенг эди.
Изоҳ (0)