Ҳиндистон жанубидаги Карнатака штатида Duranto тезюрар поезди рельсдан чиқиб кетиши оқибатида камида икки киши ҳалок бўлди, саккиз киши тан жароҳати олди. Бу ҳақда «ТАСС» хабар бермоқда.
«Ғарбий темир йўллар» бошқармаси маълумотларига кўра, поезд Каллбурги станцияси яқинида, маҳаллий вақт билан 02:00 атрофида издан чиқиб кетган.
Поездни қайта изга туширишга муваффақ бўлинган ва у ўз йўналиши бўйлаб ҳаракатда давом этган. Темир йўлнинг ишдан чиққан қисми шошилинч равишда қайта тикланмоқда, яқин вақт ичида поездлар ҳаракати қайта тикланади. Авария сабаблари ўрганилмоқда.
«Ғарбий темир йўллари» бошқармаси фожиа қурбонларининг қариндошлари ва яқинларига ҳамдардлик билдириб, товон пули тўланишини эълон қилди. Ҳалок бўлганларнинг оила аъзоларига 200 минг рупий (тахминан 3 минг доллар), жабрланувчиларга эса 50 минг рупий (тахминан 770 доллар)дан берилади.
Изоҳ (0)