Тожикистонлик ҳарбийлар Рамит дарасида олиб борилаётган аксилтеррорчилик операциялари чоғида яна тўрт жангарини йўқ қилди, дея хабар бермоқда «ТАСС». Террорчиликда гумонланган 17 киши қўлга олинди.
«Республика мудофаа вазири собиқ ўринбосари генерал майор Абдуҳалим Назарзода раҳбарлигидаги аксилҳукумат гуруҳига қарши олиб борилаётган операция Душанбедан 150 км шарқдаги олис тоғ дарасида давом этмоқда», — дейилади ИИВ хабарида. Унда таъкидланишича, махсус операциялар чоғида ўтган суткада саккизда Калашников автомати, битта пулемёт ва кўп миқдордаги ўқ-дорилар мусодара қилинди.
ИИВ маълумотларига кўра, 4 сентябрдан буён операциялар давомида Назарзоданинг жами юзга яқин тарафдорлари қўлга олинган.
Эслатиб ўтамиз, Тожикистон Ички ишлар вазирлиги 4 сентябрь куни истеъфога чиқарилган мудофаа вазирининг ўринбосари Абдуҳалим Назарзодани мудофаа вазирлигининг Душанбедаги марказий тузилмаси ҳамда Ваҳдат шаҳри ички ишлар бўлимига ҳужум уюштиришда айбланган эди.
Тожикистон Бош прокуратураси мудофаа вазирининг собиқ ўринбосари, генерал майор Абдуҳалим Назарзода ҳамда мудофаа вазирлиги полковниги Жунайдулло Умаровга нисбатан жиноий иш очди. Назарзода ва Умаров мамлакат Жиноят кодексининг тўртта— «терроризм», «давлатга хиёнат», «экстремистик гуруҳлар тузиш» ва «диверсия» моддалари билан айбланмоқда.
Изоҳ (0)