ЎФФ Филиппин — Ўзбекистон ўйинини «Спорт ТВ»да намойиш этилиши учун рухсат олиб берди

Эртага, 8 сентябрь куни жачон чемпионати—2018 саралашининг иккинчи босқичи 4-тури доирасида Ўзбекистон сафарда Филиппин меҳмони бўлади.

Бу учрашув Ўзбекистон миллий терма жамоаси учун жуда муҳим ҳисобланади. Очко йўқотиш орқали Самвел Бабаян шогирдлари жаҳон чемпионатининг учинчи босқичисиз қолиб кетиши мумкин. Барча футбол мухлисларини эса бир савол қизиқтирмоқда: ўйин «Спорт» телеканали орқали намойиш этиладими?

Ўзбекистон футбол федерацияси матбуот хизмати бошлиғи Санжар Ризаев Twitter орқали хабар беришича, Филиппин — Ўзбекистон учрашувининг Ўзбекистондаги жонли трансляцияси учун ЎФФ WSG компаниясидан «Спорт ТВ»га рухсат олиб берган. Барча нарса «Спорт» телеканали Филиппиндан келадиган сигнални қабул қилиш ёки қила олмаслигига боғлиқ.

«Дарё»нинг Ўзбекистон миллий телерадиокомпаниясидаги манбаларининг маълум қилишича, учрашувнинг намойиш этилиши учун имконият изланмоқда.

Ўзбекистон МТРКнинг расмий сайтидаги «Спорт» каналининг 8 сентябрдаги дастурлари рўйхатидан Филиппин — Ўзбекистон учрашуви ўрин олмаган. Ўйин бўлиб ўтадиган 17:00—19:00 оралиғида бошқа кўрсатувлар намойиш этилиши кўрсатиб ўтилган.

Эслатиб ўтамиз, жаҳон чемпионатининг 2-саралаш босқичидаги 16 июнь куни ўтказилган КХДР — Ўзбекистон учрашуви ҳам намойиш этилмаганди.