Ўзбекистон миллий терма жамоаси Филиппинга жўнаб кетишидан олдин терма жамоа сардори Одил Аҳмедов «Локомотив» футбол мактаби тарбияланувчилари билан учрашди. Бу ҳақда «Локомотив» матбуот хизмати хабар бермоқда.
Одил Аҳмедов Сайдулла Турсунов мураббийлик қилаётган «Локомотив—2005» футболчиларининг машғулотини кўриш учун Лабзакдаги машғулот майдонига ташриф буюрди. У ерда моҳир ярим ҳимоячини «Локомотив» жамоаси бошлиғи Қобил Юнусов, футбол мактаби директори Эркин Саидов ҳамда мураббийлар Сайдулло Турсунов ва Суннат Рўзиев кутиб олди.
Одил Аҳмедовдек футболчи билан учрашув ёш болакайларда илиқ таассурот қолдирди. Улар Аҳмедовга ўзларини қизиқтирган саволлар билан мурожаат этди, шунингдек, бирга суратга тушди.
Аҳмедов Ўзбекистоннинг энг кучли футболчиларидан бири. Унинг катта футболга кириб келиши «Локомотив»да рўй берган, бироқ кейинчалик «Пахтакор»га ўтиб кетган. Футболчи ҳозирда фаолиятини Россия Премьер-лигаси вакили «Краснодар»да давом эттирмоқда. У яқинда Ўзбекистон миллий терма жамоасининг янги сардори этиб тайинланди. Одил Аҳмедов учрашув охирида 10-рақамли футболкасини «Локомотив» футбол мактаби директори Эркин Саидовга эсдалик совғаси сифатида тақдим этди.
Изоҳ (0)