Жаҳон чемпионати—2018 иккинчи саралаш босқичи 4-тур ўйинлари доирасидаги Филиппин – Ўзбекистон учрашуви олдидан матбуот анжумани ташкил этилди ва унинг иккинчи қисмида Филиппин терма жамоаси бош мураббийи Томас Дулий ва жамоа ҳужумчиси Фил Янгхазбенд иштирок этди, деб хабар беради Ўзбекистон футбол федерацияси матбуот хизмати.
«Ўйиндан олдин кайфиятимиз жуда яхши. Баҳрайн ва Яманга қарши ўйинлардаги ғалабалардан кейин, эртанги ўйинни катта иштиёқ билан кутяпмиз. Навбатдаги ўйинга деярли тўрт ҳафта тайёргарлик кўрдик. Айрим футболчиларимиз жамоага кечроқ келиб қўшилганига қарамай тайёргарлик жараёнини тўғри олиб бордик, деб ўйлайман. Аммо бу футбол ва унда ҳамма нарса бўлиши мумкин. Биз эртага жуда тажрибали ва кучли жамоалардан бирига қарши майдонга тушамиз, улар биздан ФИФА рейтингида 50 поғона юқорида. Биз рақибни жуда яхши ўрганиб чиқдик. Бироқ, тушунарлики, бу нарса ҳали ғалабани таъминламайди. Эртага ғолиб бўлиш учун бизга бироз омад, мухлисларнинг қўллаб-қувватлашлари ҳам керак бўлади. Бизни қизиқарли ўйин кутяпти», — дея ўйин ҳақидаги фикрларини билдирди Дулий.
Фил Янгхазбенд ҳам учрашув ҳақида тўхталиб, шундай деди: «Мураббий айтиб ўтганидек ўйин олдидан жамоанинг кайфияти аъло даражада. Биз ўйинга яхши тайёргарлик кўрдик. Рақиб футболчиларини яхши ўргандик. Шунингдек, ўз имкониятларимизни ҳам яхши биламиз. Кўрсатмаларни тўғри бажарсак ва яхши ўйин кўрсата олсак, мақсадимизга эришамиз, деб ишонаман. Ҳа, Ўзбекистон Осиёнинг топ жамоаларидан бири. Бироқ биз жаҳон чемпионати ёки Осиё кубоги каби мусобақаларда ўйнашни истасак бу каби кучли жамоаларни енгга олишимиз керак».
Томас Дулий журналистлар саволларига жавоб берар экан ўйинда Филиппин аутсайдер экани, Ўзбекистонга қарши учрашувда мағлуб бўлиш қўрқинчли эмаслиги ва бу нарса ўз жамоасига қўл келиши мумкинлигини таъкидлади.
«Фил, албатта, жамоамиздаги энг етакчи футболчилардан бири. Албатта, Ўзбекистон терма жамоаси ҳам уни кўздан қочирмасликка уриниши аниқ. Уларнинг таркибида эса деярли барча футболчилар хавфли. Биз бу ўйинда аутсайдермиз. Буни ҳеч ким инкор қилаётгани йўқ. Улар ғалаба қозонишга мажбур. Улар албатта олдинга ташланади. Биз эса уларнинг ожиз нуқталарини топишга ва шундан фойдаланишга ҳаракат қиламиз. Бу нормал ҳолат. Бизнинг йўқотадиган нарсамиз йўқ. Улар рейтингда 76-ўринда. Бу ажойиб натижа. Уларда Россия, Хитой, Жанубий Кореяда ўйнайдиган футболчилар бор. Ўзбекистонга ютқазиш – қўрқинчли эмас. Ўйинда фаворит ҳисобланиб, ютқазиб қўйсанг, ҳа, бу жуда ёмон. Аммо эртанги ўйинда ютқазиш фожиа эмас. Биласизми, шунинг ўзи ҳам бизга қўл келиши мумкин. Жамоа ортиқча босимсиз ҳаракат қила олади. Ягона мақсадимиз филиппинликларни хурсанд қилиш ва шунга интиламиз ҳам», — дейди Филиппин терма жамоаси бош мураббийи.
Изоҳ (0)